Strömern un buttjern

Anzeige
Wochenblatt-Kolumnist Sonny Holst
Ne!, - sä mien Grootmudder jümmers, de Jung is nich to Huus, wenn na mi fraagt wöör, he is woll wedder strömern.
Ofschoonst dat nu all över sößtig Johr her is, buttjern dau ick hüüt noch girn. Wokeen nich weit, wat strömern odder buttjern is, den will ick hier mal verkloorn.Tominst dat versöken. Man hett dat in’n Blaut odder nich. Kann sachs an de Gene liggen. Up best to verklooren is dat woll, wenn ick mal vun mien Strömertouren vertell. Mit spazeern gahn, mit Joggen odder Nordic Walking hett dat nix to daun.
Nu mark ick, dat dat gonnich so licht is wat in een Minschen vörgeiht de girn buttjern deit, liekers will ick versöken dat lebendig röver to bringen. Mien Andrieber is de Natur. Un los geiht dörch Holt, över Wischen, dörch de Feldmark odder an een Beek lang, egal, meisttiets ohne fasten Padd.
Je na Johrestiet gifft veel to beleven un to beluurn. Wietkieker un een Bestimmungsbauk heff ick jümmers bi mi. To Fröhjohrstiet, wenn dat Rehwild noch Schontiet hett löppt se di sachs övern Weg. In April/Mai, wenn de Mümmelmann up de Wischen siene Rammeltiet hett ,kannst di högen. Verjagen kannst di, wenn een Fasan ut de Deckung kümmt. Vun wieden hörst dat Trompeten vun de Kraniche. An Heven küselt een Bussard. Nu ward Tiet dat Bestimmungsbauk to Hand to nehmen. Is dat villicht gorkeen Bussard? Un wenn, wat vun Oort Bussard? Muusbusard odder villicht een Rohrweihe, amenn sogor de rode Milan? De Schlötelblaumen un de veelen Windbuschröschen sünd al lang verblöht. Siet Kinnertieden weit ick een Steed mit Maiglöckchen, wo ick dann un wann mal hen buttjern dau üm een lütten Struuß för to Huus to plücken. Veraden dau ick de Steed nich. Wohrschuun mütt ick ook, dat mi de Waldmeister nich in Saat schütt, denn blots so behüllt he sien Ruch üm in’n Kleederschapp de Motten to verjagen un fein to rüken. An de Beek kiek ick mal na, of de lütten Haselfisch al na Insekten up stieg. So na un na kümmt de Tiet, wo de Bickbeerrn riep ward un de wilden Kirschen.
De Himbeeren in de frie Natur smeckt veel beder as ut de Plantaasch. To Harvst sünd de Fleiderbeeren an de Reeg. So’n heiten Fleidergrog to Wintertiet, villicht noch mit Schuß Rum, is wat wunnerbores. Denn sünd de Brummelbeeren an de Reeg, wenn se öllich Sünn kregen hebbt, döögt se för Brummelbeergelee, aver meist sünd se to suur. Tum Sluß, wenn de eiste Nachtfrost uns överrascht, sünd de Slöhn an de Tour. Slöhnlikör mmmm, dor frei ick mi al up. Nicht vergeten will ick hier dat Pilze söken, wobi dat bi mi bit’ söken blifft. Fährten lesen un Losung utmaken is veel interessanter. Männigmal kannst di ok böös verjagen, wenn so’n Swattkittel odder sogor een Rott ut’n Ketel benscht. So, nu weit ji wat strömern un buttjern is. Heel wichti is ook, dat man alleen ünnerwegens is, sick ruhig un sachte dörch de Natur sliekert. Wokeen düsse Passion nich in’t Blaut hett, hett villicht een Annere un at is ook gaud so. Jedeen sien Pläseer!
Sonny!
Anzeige
Anzeige
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.
Anzeige
Anzeige